Kadot en die Profete is ‘n produksie wat deur die KICK (Kinders in Christus Kan) Produksies Trust vrygestel en deur Lizel Donovan versprei word.

Dit is die breinkind van Lizel Donovan, ‘n oud geoktrooieerde rekenmeester, en nou voltydse mamma. Die produksie het die lig gesien met die hulp van nog ‘n mamma, Liezel Olivier-Rossouw wat ‘n kleurvolle televisie agtergrond het.

Om geboorte te gee aan die hoofkarakter, Kadot die donkie, is die talente van ‘n veteraanspan ingeroep. Antoinette Snyman – van Wielie Walie dae – was verantwoordelik vir die skepping van die dierbare donkie, en is ook die poppemeester wat aan Kadot lewe gegee het gedurende die produksie.

Lochner de Kock, met sy begaafde vermoë om lewe te gee aan kinderkarakters het geskaaf en geskaaf totdat hy ‘n nommerpas stem vir Kadot gevind het. So het Antoinette en Lochner, uit ‘n pragtige maar lewelose handpop, ‘n dromerige, dommerige, leergierige plaasdonkie gekep. Kadot het sy eie personlikheid aangeneem en het veel meer as net ‘n pop geword, Kadot het verteenwoordiger geword van kleuters wat oor baie dinge wonder, en oor baie dinge vrae het.

Helenè Bester, bekende sangeres, met haar liefde vir kinders was van die begin af deel van die projek. Sy het die geleentheid gebruik om haar liefde vir haar Skepper met kinders te deel. Sy en haar komponis vriendin, Mariëtte Galjaard, het ‘n musiek kwaliteit neergepen wat oud en jonk kliphard wil laat saamsing. Di nuwe liedjies wat spesiaal vir Kadot geskryf is, is so spesiaal, dat mens nie anders kan as om God se hand daarin raak te sien nie.

Om die regte aanbieder te vind, wat ‘n vriend en vertoueling van ons dierbare donkie kon wees, het in ‘n baie lang soektog ontaard. Na vele oudisies en met die hulp van verskeie bronne, en ook, nadat ons al op moedverloor se vlakte was, het Ivan Botha – van onder andere "Bakgat", "Villa Rosa" en "Getroud met Rugby" faam - verskyn as Kadot se mentor, Paul. Ivan straal daardie ondefinieerbare "iets" uit wat jonk en oud by hom laat aanklank vind.

Ds Petrus Harmzen, van die Nederduits Hervormde kerk, Hartbeesfontein, het met die eerste onderwerp "Kadot en die Profete" vorendag gekom. Antoinette Snyman het die konsep aangepas vir multimedia, terwyl ds Petrus deurentyd sy oog oor die teologiese aspek van elke episode gehou het.

Marcel Rossouw, ‘n baie begaafde kunstenaar, het 50+ illustrasies, met die hand en digital geskets, en dan ook nog beweging ingebring, wat aan elkeen van die profete en hul omstandighede lewe gegee het.